Թուրքիա - Պատմական Եղելութիւն մը` ՜՜Պատարագ Մատուցուած Է Սումելա Օրթոտոքս Պատմական Մենաստանին Մէջ։

Առաջին անգամ ըլլալով, 88 տարի ետք պատարագ կը մատուցուի Թուրքիոյ Տրապիզոն շրջանի Սումելա մենաստանին մէջ։ Արդարեւ Կ.Պոլսոյ տիեզերական պատրիարքը անձամբ կարողացած է պատարագ մատուցել Ս. Աստուածածնայ Վերափոխման տօնին առթիւ Սումելա մենաստանին մէջ, որ կը գտնուի Տրապիզոնի հսկայ ժայռի մը վրայ կախուած։ Աւելի քան 1500 ուղղափառ հաւատացեալներ մասնակցած են ծիսակատարութեան, որոնց 500 ը միայն կարողացած են մենաստանի եկեղեցին մտնել։

Նշենք թէ Սումելայի մենաստանը դարերէ ի վեր եղած է հաւատացեալներու համար Աստուածամօր մէկ աղօթավայրը ։ 88 տարիներ առաջ թուրք կառավարութիւնը բռնագրաւած էր մենաստանը ու թանգարանի վերածած։